У цэнтры Брэста старая жывіцца з кантэйнера

Сымон БАЙ для TOMIN.BY

У цэнтры Брэста старая жывіцца з кантэйнера. Мясцовыя кажуць, бачаць яе тут здаўна.

Лічу непатрэбным указваць дакладныя каардынаты кантэйнера. Як кажуць, “ёсць у рэдакцыі”. Важны сам факт: не ўсім  гэтай зімой есца соладка.

Да жабракоў, асабліва пэўнай “масці”, недавер вялікі. Надта ўжо прафесійна іхнія дзеці бегаюць па пад’ездах. Ні разу не бачыў іх каля кантэйнераў. Як і бялявага Лёніка, які за гадзіну сядзення “вінтом” на Пушкінскай можа дазволіць сабе паход у “Еўраопт” непадалёку.

А вось гэтая старая выклікае нейкі давер – сваёй паставай, няспешнай, стомленай манерай. Бачна: ні перад кім не іграе спектакль. Яна проста выбірае  з кантэйнера ва ўкормным месцы ежу. Мабыць, мае хатніх звяроў. Магчыма, з імі дзеліцца. А няхай сабе і ўсё ім аддае – яе нямецкія раўналеткі гэтага рабіць не мусяць.