Яўген БЯЛАСІН для TOMIN.BY
Урок , ЯК НЕ ТРЭБА РАБІЦЬ, даюць проста зараз, гэтымі днямі на азначанай вуліцы за гіпермаркетам “Карона”, калі ехаць у бок цэнтра. Там да скрыжавання з Піянерскай паклалі суцэльны асфальт. Кладуць яго, пакідаючы прыпынкі грамадскага транспарту, і за скрыжаваннем – да Кобрынскага моста.
Дык вось, месяц які новае палатно праляжала – і вось ужо ўзнялася з яго вышэй за бардзюр купіна-хваля перад пешаходным пераходам да Лядовага, паўстала-вытыркнулася другая, насупраць “Беларусбанка”.
Прачытаўшы ў інтэрнэце, што днямі ў маскоўскім аэрапорце Дамадзедава засеў у асфальце і не змог выкаціцца на рулёжку, спазніўся на 5 гадзін з вылетам Boeing737, я разумею, што гэта з’явы аднаго парадку. І гэта не новазаяўлены “русский мир” – гэта савецкі свет, які ад нас з яго нядбайнасцю і безадказнасцю і не сыходзіў.
Упэўніваюся ў гэтым, раскопваючы гісторыю новага асфальту, які адразу трэба рамантаваць.
Як бачым на фота, рамантуюць яго, зрэзаўшы купіны-хвалі фразой. Дарожнікі каля ЦМТ падказалі, што рэмонт выконвае вядомая брэсцкая фірма.
Брыгаду знаходжу перад Кобрынскім мостам. Якраз кладуць масіўную заплату перад тралейбусным прыпынкам. Не трэба і майстра – рабочыя самі ведаюць, што гоняць халтуру.
- Падкладка пад асфальтам дрэнная, трэба мяняць так, як на вуліцы Купалы мянялі – выбіраць грунт на 60 см і рабіць новую падсыпку, – кажа Міхаіл.
Кажу, што нямецкая норма 90 сантыметраў. Махаюць галовамі: ага, немцы народ якасці.
- Дык навошта вы робіце заведамую халтуру? – пытаю.
- А нам гарвыканкам грошы толькі на касметычны, паверхневы рэмонт даў. На капітальны ў іх няма, відаць, - адказвае Міхаіл.
Вось вам і адказ. За дарогі плацім ўжо ці не трайным падаткам (у акцызе за дарагое паліва закладзена, плюс увялі цяпер за права выезду на дарогу, плюс за тэхагляд ці не цераз край будзе, з кожнага аўтамабіля) – а тут нават галоўную трасу горада рамантуюць так, што на новы асфальт мусяць адразу ставіць латкі!
Заўважу: паколькі грунт пад зрэзанымі купінамі не вымаюць, то і гэтыя латкі хутка папучыць.
Як кажуць, прыехалі...