Брэсцкую вобласць на фестывалі прадстаўляў народны ансамбль народнай музыкі настаўнікаў Ленінскай ДМШ Брэсцкага раёна “Музычны вянок” пад кіраўніцтвам Марыны Пракошынай.
Калектыў годна прадставіў Брэсцкую вобласць у конкурснай праграме. Пра гэта TOMIN.BY паведамiла загадчык інфармацыйна-аналітычнага аддзела ДзУК “Брэсцкі абласны грамадска-культурны цэнтр” Наталля Бернат.
«Салісты ансамблю Наталля Дырман і Яўгенія Дарашкова выступілі ў намінацыі “Прыпеўкі”. Гэты нумар быў настолькі яскравым, арыгінальным і вяселым, что, ніводны глядач у зале не застаўся абыякавым. Іх выступ быў адзначаны Дыпломам “За захаванне народных традыцый” ІІ ступені», - сказала Наталля Бернат.
Зазначым, што XVІ Міжнародны фестываль народнай музыкі “Звіняць цымбалы і гармонік” адбыўся ў г. Паставы Віцебскай вобласці.
Гэта адзін з самых старэйшых фестываляў Беларусі, ён уваходзіць у тройку найбольш прафесійных і папулярных у краіне.
Сёлета святочны фэст сабраў у Паставах звыш 20 самабытных калектываў з Беларусі, Расіі, Украіны, Літвы, Славакіі, Польшчы, Латвіі і Венесуэлы. На працягу трох дзён яны далучалі гараджан і шматлікіх гасцей свята да традыцый народнай музыкі.
Падчас урачыстага адкрыцця фестывалю, наведвальнікі свята пазнаёміліся з творчасцю народных музыкаў — як знакамітых, так і малавядомых.
Фестываль выйшаў за межы горада. Яго ўдзельнікі выступілі ў шматлікіх населенных пунктах раёна. А завяршылася свята ў гарадскім парку ўшаноўваннем пераможцаў і гала-канцэртам, якому папярэднічала тэатралізаванае шэсце па вуліцах горада.
«Арганізатарамі свята быў запланаваны шэраг разнастайных мерапрыемстваў на любы густ: канцэрты арганнай, класічнай і эстраднай музыкі, тэатралізаваныя прадстаўленні і агляды-конкурсы, выстаўкі-продажы і шмат чаго іншага, але, на жаль, сонечнае надвор’е запланаваць не атрымалася.
Летняя навальніца перыядычна перашкаджала атрымаць асалоду ад прагляду таго ці іншага мерапрыемства, а адкрыцце і закрыцце фестывалю, наогул, з-за дажджу не атрымаліся», - падкрэслiла Наталля Бернат.