У Брэсце дождж стварыў мініпаводку на вуліцах

Сымон БАЙ для TOMIN.BY

У сераду ў Брэсце мераскацела і крапала з абеда.

У выніку вуліцы апынуліся ў падтопленым стане. Асабліва прыкметна гэта было ў цэнтры горада, дзе рэльеф вуліц мае ўхіл  да вуліцы Гогаля, і  далей на поўдзень у бок Мухаўца. Дарэчы, у месцы, дзе цяпер праходзіць вуліца Гогаля, калісьці даўно працякала рачулка.

Падвышанай колькасці вады спрыяла праз інтэнсіўнае таянне снегу і тэмпература – яна сягала да плюс 4 градусаў.

Дождж абяцаюць і ў чацвер.  Тэмпература яшчэ падымецца – у пятніцу да плюс 5, а ў нядзелю нават да плюс васьмі. Затое ўжо ў суботу сіноптыкі абяцаюць сонца.

Вадзяністы люты ў Брэсце адзначаецца і высокай вільготнасцю паветра – ад 95 да 100 адсоткаў.