У Брэсце каля помніка 1000-годдзю Брэста прайшла экалагічная акцыя

Сымон БАЙ для TOMIN.BY

У Брэсце каля помніка 1000-годдзю Брэста  прайшла экалагічная акцыя.

Там, дзе вуліца Гогаля, гэты фактычна бульвар, прымыкае да мікраплошчы вакол помніка з усходу, школьнікі з пяці мясцовасцяў Берасцейшчыны расставілі свае інсталяцыі – стэнды і столікі з буклетамі. Дзеці з зялёнымі гальштукамі і галаўнымі ўборамі прэзентавалі  экалагічныя славутасці сваёй мясцовасці.

Было прадстаўлена два паркі (Кобрынскі і Ястрамбельскі), некалькі пасяленняў і заказнік. Яго – а гэта быў Спораўскі заказнік – асабліва арыгінальна, праз фітапрацэдуры,  прэзентавалі эколагі з Бярозаўшчыны. Атрымалася адведаць гербаты (травянога настою) “Из лесу”. Выбраў з трох магчымых.

Вучань адной са школ Кобрына Андрэй распавёў пра гарадскі парк, якi носіць імя Суворава - ў свой час належаў слыннаму расейцу на правах царскага падарунка (за ўтаймаванне  паўстання  пад кіраўніцтвам Тадэвуша Касцюшкі – С.Б.).

 “Поскольку у Суворова не было детей, после его смерти парк  перешел в собственность города. Редкие породы деревьев, посаженные прежде, остались. Некоторые дожили до наших дней”, – адчыбучыў Андрэй. 

 А вось з буклецікам схітравалі дзеці – “пазычылі” гатовы ў парка. Але ён завостраны на забаўленне (атракцыёны, аквапарк), так што дзядзька хацеў дома ў цішы пачытаць пра рарытэтную флору парка, але не давялося.

Аб’ектам прыцягнення мінакоў зрабіліся каля ста фотакартак, развешаных на вяроўцы паміж дрэвамі. На іх былі размаітыя птушкі, рэдкія і\або прыгожыя.

Таксама жадаючыя маглі паслухаць кароткую лекцыю пра энергазберажээнне і паасобнае збіранне смецця. 

Можна было купіць рэдкія, лекавыя расліны ў гаршчочках. Кошты не сягалі за 20 тысяч. Па прычыне эпізадычнасці, няйначай, пакупнікі ў чаргу не выстройваліся, і жанчыны за столікам выкінулі нават капітулянцкі слоган “Распродаж”, але, убачыўшы фотаапарат, прыхінулі яго да стала. 

Арганізатарамі акцыі  былі  Брэсцкі абласны эколага-біялагічны Цэнтр навучэнцаў, упраўленне адукацыі Брэсцкага аблвыканкама, Брэсцкі абласны цэнтр прыродных рэсурсаў і аховы навакольнага асяроддзя, пры падтрымцы  цэнтра экалогіі ўніверсітэта імя Пушкіна.

 Загадчыца  арганізацыйна-масавага аддзелу эколага-біялагічнага Цэнтра навучэнцаў Анна Іосіфаўна Ударава сказала, што акцыя прыўрочаная да Міжнароднага Дня аховы навакольнага асяроддзя, які адзначаецца якраз 5 чэрвеня. 

 “Лучших для поездки в Брест отбирали. Польза какая? Собственными ушами, что говорится, слышала. Две женщины после нашей лекции по дороге домой переговаривались. Одна другой и говорит: «Я и не знала о раздельном сборе мусора. Теперь буду выкидывать раздельно».  Значит, человек и себе взял на заметку, и другим расскажет”.

Была на выставе адзiная кніга па-беларуску “Стратэгія ўстойлівага развіцця Белаазёрскага сельсавета”.  На звароце грыф “Выдадзена пры фінансавым спрыянні Еўрапейскага Саюза”.

Памятаецца, што ёсць, побач э экатурызмам, такая пазіцыя  спрыяння ў праграме “Дапамога Беларусі” Федэральнага ўрада Нямеччыны.