Яўген БЯЛАСIН для TOMIN.BY
Статуя з адбойным малатком на даху будынка ў Мінску пачала адбіваць бетон. Каб ён не падаў на галовы мінакам, знізу статуі прырабілі адмысловы шчыт.
Зрэшты, шчыт ля краю даха на чатырохпавярховым будынку Сувораўскай вучэльні, што па вуліцы Багдановіча, можа мець і яшчэ якую, паралельную функцыю. Прыкладам, ён можа выкарыстоўвацца як рыштаванне для абслугоўвання статуі рабочага, а з ёю і трох пазасталых статуй, а гэта напарніца рабочага і салдат-пехацінец ды танкіст з другога боку франтона.
Праверыць гэта цяжка, бо хто пусціць на дах будынка, які настолькі сакрэтны, што з вуліцы абазначаны толькі дошкамі – на адной напісана, што “тут в 1933 году был… Михаил Иванович Калинин”, а на другой, што ў далёкім 1922 годзе камандзірскімі курсамі тут камандаваў “герой …Фабрициус Ян Фрицевич”.
Апаска ўзмацняецца пасля агляду глухога трохметровага муру вакол прымыкаючай тэрыторыі і перарастае ў нейкую трывогу, калі ўчытваешся ў вензель на ляпніне часоў сталінскага ампіру. Там недвухсэнсоўна прапісаныя Маркс, Энгельс, Ленiн і нават Сталiн (не прыбралі ўслед за манументам у 1960-х гадах).
Містычны, выходзіць, дамок. І толькі з праезду бронзавая статуя малога ў бацькавых кіцелі ды фуражцы і старавечная гармата на колах як ад вясковага воза дазваляюць здагадацца, што тут вучаць сувораўцаў.
Так што, наконт статуй на даху, верым фотазуму. А ён выразна паказвае: пад рабочым з адбойным малатком пастамент парэпаўся і месцамі выкрышыўся, у той час як пад вайскоўцамі ён гладкі, непашкоджаны.
Дахавая статуя. Беласток.
Дарэчы, ні ў Беластоку, на палацы Браніцкіх , ні ў Парыжы, на Версалі, Фантэнбло ці Саборы Парыжскай Божай Маці, каля якіх мне летась давялося пабываць, дахавыя і франтонныя статуі не маюць пад сабой ніякіх прыладаў для ўлоўлівання чаго кольвечы.
Скульптурная група на грамадскім будынку. Парыж.
Яно і зразумела: калі пачало церусіцца – трэба найперш баяцца, каб не грымнулася ўсё. А ў такім выпадку ніякія шчыты ніц не ўтрымаюць і нікога не ўратуюць.
Франтонныя скульптуры. НОТР ДАМ дзю Пары.
Брэст – Мінск, 9.01.2014