На пешаходнай брэсцкай вуліцы Савецкай учора зладзілі дзяўчыннік. Некалькі прывабных і абаяльных крыху павар’яцілі.
Дзяўчаты часткова – vоila! – завуаляваліся. Начапілі на валасы хто нешта накшталт вясельнага вэлюму, а хто меў і больш поўны вясельны строй (“фату”). Так сказаць, занявесціліся – і ладзілі ФАТАсэсіі то тут, то там. Трапілі і на маю.
“Ходзім ужо з абеда”, – сказала прызначаная на спікера Юлія. – “У нас дзяўчыннік. Сяброўка ў суботу замуж выходзіць. Так што сёння апошні дзень з ёю. Калі больш дакладна, паўдня. Дапазна пабудзем разам.”
Нявесту клічуць Ірына. Яна пацвярджае: так, у суботу памяняе сацыяльны статус. Будучы муж прадае аўтазапчасткі.
"Ці гэта новая традыцыя – ладзіць дзяўчыннікі на Савецкай", - пытаю.
“Замест дыскатэкі”, – адказвае Юлія.
Што ж, традыцыі маюць традыцыю ўсталёўвацца явачным парадкам.
Прызначаныя традыцыі… Не жыльцы, на маёй памяці.