 |
|
На бульвары Шаўчэнкі ўпаў матацыкліст. Яго завезлі ў бальніцу з падазрэннямі на пераломы.
Чалавек не даехаў да паварота якіх 20 метраў. Сведкі кажуць, яго падрэзаў невядомы аўтамабіль.
Версія выдае на праўду, бо бачна, як матацыкліст раптам выехаў на бардзюр злева, стукнуўся аб жалезную агароджу і вылецеў ужо ў падзенні назад на сваю паваротную паласу.
Жалезная агароджа крыху зрушана, у магутным матацыкле збітыя дугі бяспекі і паабляталі такія-сякія дробныя дэталі.
Інспектары ДАІ правяраюць як прапанаваную версію, так і надта верагодную версію перавышэння хуткасці. А яе тут сама рэалізаваў нейкі вар’ят на матацыкле, які з разгону праехаўся перад Клімуком з боку Кобрынскага моста на заднім коле.
Што і казаць, вялікая спакуса, калі пад табой магутны рухавік, а на тваіх плячах пустая галава.
Навошта нам гэта ў горадзе? Каб дзеўкі бачылі? Дык яны і ўздоўж знака, які абазначае мяжу горада, стаяць. І далей па трасе гуляюць. Едзьце за горад і нагружайце там пустую, улучна з вамі, прастору дэцыбеламі і небяспекай.
Застаецца нагадаць, што гадоў з 5 таму назад адзін нецярплівы-нешчаслівы так разагнаўся, што пры падзенні яму адарвала нагу. Памёр ад болевага шоку і страты крыві.