Пайшлі трэшчынамі частка будынка занальнага Цэнтра гігіены і эпідэміялогіі і гаражы выканкама Брэсцкага раёна. Некаторыя звязваюць гэта з будоўляй супермаркета “Астор-вэст”. Прынамсі, гігіеністы просяць пра адшкадаванне акурат новых суседзяў.
Супермаркет на месцы пустэчы на праспекце Машэрава пасля яго перасячэння з вуліцай Камуністычнай амаль цалкам узведзены. Пад яго капалі глыбокі катлаван і забівалі сваі.
Гігіеністы кажуць, што расколіны на цокалі Цэнтра, які месціцца па вуліцы Харужай насупраць новага супермаркета, з’явіліся менавіта пасля працаў нулявога цыклу ў суседзяў.
Ім гэта асабліва прыкра, таму што іхні будынак таксама зусім новы. Яго паставілі некалькі гадоў таму назад на месцы былога драўлянага зусім заняпалага памяшкання. І вось яно ўжо пачало рэпацца.
Паводле ўласнай інфармацыі, пацярпелыя гігіеністы звярнуліся да ўладальнікаў супермаркета з просьбай прадаставіць будматэрыялы для ліквідацыі трэшчын. Сваю ненастойлівую просьбу яны накіравалі гаспадарам “Астор-вэста” пісьмова.
Што да гаражоў выканкама Брэсцкага раёна, то там нешматлікія расколіны таўшчынёй да сантыметра ўжо замазалі растворам.
Выглядае саматужна, але і пабудовы не надта каб шык, з белай сілікатнай цэглы.