“Групай” выставіліся 15 аўтараў. З іх сем жанчын і васьмёра мужчын.
“Веснавыя матывы” – так аўтары паспрабавалі словамі абагульніць характар прадстаўленых работ. Прахадных работ на выставе, якая заняла спецыялізаны зал Грамадска-культурнага цэнтра (другі паверх, побач з прымальняй абласнога ўпраўлення культуры) фактычна няма. Вылучыць кагосьці давядзецца вам самім, – бо гэта варта наведвання.
Назаву бадай што некалькі імёнаў і пакажу, у выпадковай чарговасці, частку працаў.
Уразіў выявай веснавой чырвонагрудай птушкі на фоне снегу Мікола Маеўскі. У водгуллі сваёй “Плесы” набірае моцы Міхаіл Канькоў. Зноў не пакінулі абыякавым сёстры Рэдзька.
Дзве розныя працы прадставіў Павал Кульша. Працы Іны Дзянішчык найбольш спадабаліся “ключавому чалавеку” выставы – зал, зразумела, не адчынены без наведнікаў. Спрачацца не стаў, але і пярэчыць катэгарычна не выпадае.
Ёсць стыльныя працы Анатоля Мелехаўца, Нілы Гарчанюк.
Зноў прыкметная фарбамі і Наталля Чарнагалава. Праўда, з некаторага часу дзялю яе карціны ўмоўнымі лініямі на зоны распілу. Нядаўна даведаўся, што мастачка, па жаданні кліента, прадае свае творы часткамі, адпілоўваючы патрэбную плошчу.
Выстава адчынілася ў сераду, 20 марта. Пра тэрміны арганізатары не паведамляюць. Таму спяшайцеся.
