 |
|
Сымон БАЙ для TOMIN.BY
У Бярозе выставілі ілюстрацыі францускага часопіса “LeMondeillustrè” да паўстання 1863 года.
Артыкулы напісаныя спецкарэспандэнтамі. Сярод ілюстратараў тэкстаў Гюстаў Дарэ.
Усяго ў Галерэі мастацтваў выстаўлена 34 ілюстрацыі да артыкулаў часопіса. Усе яны з прыватнага фонду. На выявах вачыма еўрапейцаў можна ўбачыць падзеі 1863-1864 гг., якія адбываліся на землях сучаснай Беларусі, Літвы, Польшчы і Украіны.
Наведвальнікі могуць таксама паглядзець відэаролік пра Кастуся Каліноўскага, ягоны партрэт і газету “Мужыцкая праўда”.
Супрацоўніца галерэі Аксана Малік патлумачыла: паколькі магчымасці выдрукоўваць фатаграфіі на той час не было, то ілюстрацыі былі важным сродкам данясення інфармацыі да збольшага непісьменнага насельніцтва.
Пяцёра спецыяльных карэспандэнтаў і відавочцаў апісалі важныя падзеі паўстання – фармаванне вайсковых аддзелаў, баі, высячэнне царскімі войскамі лясоў у Мінскай губерніі, каб спыніць партызанку, рэпрэсіі пасля паразы паўстання.
Прыкладам, знаходзім выяву праходжання паўстанцаў праз вёску Слуцк, падрыву цягніка ўлучна з паравозам, прымусовай прысягі сялянаў царскаму чыноўніку, калоны выселеных ліцвінаў на маршы ў Яраслаўлі.
Выстава будзе чынная да 12 сакавіка.