Віцэ-прэмьер Сямашка адмовіўся сустракацца з работніцамі “Дываноў Брэста”

Сымон Бай для TOMIN.BY

Сустрэчу ў сакавіку Сямашка паабяцаў цягам мінулага прыезду ў студзені.

“Але і цяпер не схацеў,  – кажа адна з работніц. – Перадалі нам, што прапануе сустрэцца напрыканцы красавіка”.

Нагадаем,  у студзені жанчыны, абураныя нізкімі заробкамі, зладзілі мітынг і лавілі віцэ-прэмьера Сямашку ў цэхах. Ён прыгразіў  “зняць  на сходзе калектыва праз два месяцы, калі не справіцца”, дырэктара Леаніда Шалковага, які паабяцаў работніцам падвышку заробку з 300 тысяч да трох з паловай мільёнаў рублёў у месяц.

 “Цяпер дырэктара не знімуць, мабыць, – кажа адна з “мінынгоўшчыц”,  Ганна Марчук. – Ткачы працавалі нават у выходныя, дык ім налічылі каля 4 мільёнаў за люты.  Іншым, праўда, каля 2 мільёнаў. Аднак людзям, пасля году безграшоўя, і гэта шмат.”

Работніцы баяцца іншага: прадукцыя слаба рэалізуецца. “Скончыцца крэдыт, і нас зусім закрыюць”.

Частыя прыезды на “Дываны Брэста” высокага начальства звязаныя з цяжкім становішчам прадпрыемства – канвеер стаяў з вясны да снежня 2012 года. Перад Новым годам  “Дыванам Брэста” вылучылі крэдыт у 8 мільярдаў 300 мільёнаў рублёў.

У канцы красавіка на прадпрыемстве будзе падпісвацца калектыўная дамова адміністрацыі і прафсаюза. Не могуць не ўсплаць пытанне заробкаў, мэтазгоднасці выдаткавання грошай і акцый. Як вядома, улады прынялі рашэнне павялічыць удзел дзяржавы ў Адкрытым акцыянерным таварыстве, якім з’яўляецца прадпрыемства “Дываны Брэста”. 

 Напэўна, пра перадачу часткі акцый дзяржаве і будзе казаць віцэ-прэмьер на сходзе ў красавіку, мяркуюць работніцы.