Сымон БАЙ для TOMIN.BY
Беларуска, для якой збіраў грошы футбольны клуб "Шальке-04", папраўляецца пасля аперацыі. Такую выснову зрабіў пасля азнаямляльнай паездкі дабрадзей Дар'і Ігнатавай, Аляксандр Віганд.
13-гадовая бабруйчанка атрымала аператыўнае лячэнне ў Мюльхайме і цяпер на рэабілітацыі дома. Спадар Віганд (Alexander Wiegand), кiраўнік дабрачыннай арганізацыі "Сэрца дзецям" (EinHerzfürKinder) кажа:
– У мяне ёсць сябар. Яго завуць Франц Лінэкэ. У яго добрыя стасункі з футбольным клубам "Шальке-04". Ён дапамог мне фінансава зладзіць аперацыю Дар’і Ігнатавай у Нямеччыне. Адбылася дабрачынная гульня з удзелам клуба. З гульні мы атрымалі 19 тысяч, ад газеты "Більд" яшчэ 28 тысяч еўра. Усяго назбіралі больш за 50 тысяч еўра.
Збіралі нават вучні 1-га класа, аднакласнікі дачкі спадара Віганда. Назбіралі больш за 200 еўра манетамі.
Дар’я Ігнатава хварэла на рак. У Нямеччыне ёй выдалілі пухліну мозгу. Дзяўчынка адчувае сябе няблага. Мае патрэбу ў нескладанай аднаўляльнай аперацыі, якая найхутчэй пройдзе ў Беларусі, сказаў спадар Віганд.
"Шальке-04" з Дар’яй Ігнатавай.
Я патэлефанаваў у Бабруйск. Слухаўку падняла Наталля Аляксандраўна, мама Дар’і Ігнатавай:
– Дар’і пасля аперацыі лепш. Рыхтуемся ісці ў школу. Што ёй трэба? Ёсць патрэба ў спецыяльнай гімнастыцы, практыкаваннях, каб падтрымаць функцыянальнасць правай рукі. Дысфункцыя стойкая ў яе пасля выдалення пухліны. Будзем праходзіць курс тут, на месцы.
У размове высвятляецца, што ў Дар’і Ігнатавай статус пацярпелай ад Чарнобыльскай аварыі. Праз экалогію гэта здарылася, мяркуе яе мама.
Аляксандр Віганд даведаўся пра Дар’ю Ігнатаву выпадкова. Сам ён у Беларусі наездамі, заязджае да бацькоў жонкі ў Брэст.
Пытаю, ці не мог бы ў Бабруйску знайсціся які спонсар. Наталля Аляксандраўна кажа, з гэтым надта цяжка. Абяцаю даведацца ў тамтэйшай камандзе вышэйшай футбольнай лігі "Белшына", ці не маглі б яны, хоць у прапорцыі на нашу беднасць, паспаборнічаць у спонсарстве з Шальке 04.
Але назаўтра размова стала непатрэбнай. Прачытаў у нэце: у "Белшыны" за даўгі забралі аўтобус.
Фота з архіва А.Віганда.
Вместе с вами TOMIN.BY хочет помочь выздороветь Артему Колесникову (фото)